موقف..
🌹 الفنان الراحل "خالد صالح" كان له أخ إسمه الشيخ "إنسان".. أيوا هو إسمه كده.. "إنسان".. الشيخ "إنسان" كان فاتح مطعم وكان بيشتغل معاه واحد إسمه "عبادة".. "عبادة" ساب الشغل فجأة ودى كانت ورطة لـ "إنسان" اللى لقى عنده عجز فى عدد العمالة اللى هي أساساً معدودة.. محدش فهم سبب تصرف "عبادة" بس الدنيا مشيت عادي والشيخ "إنسان" شاف عامل تاني بديل..
🌹 بعدها بفترة فوجىء الفنان "خالد صالح" بإتصال من العامل "عبادة" اللى كان بيشتغل مع أخوه الشيخ "إنسان" بيسأل عن الشيخ.. عرف من "خالد" إن الشيخ سافر وقفل مشروعه خلاص وسأل "عبادة" هو عايز إيه منه..؟!
"عبادة" قال إن الدنيا ملطشة معاه وحاله زي الزفت لدرجة إنه مش لاقي فلوس يجيب فول وطعمية لولاده وفى نفس الوقت هو مكسوف من الشيخ "إنسان" بعد ما سابه فجأة من سنين..!! المكالمة إنتهت فجأة ولما حاول "خالد" يتصل تاني إكتشف إن "عبادة" كان بيتصل من سنترال..!! وقرر "خالد" يوصل لـ "عبادة" بأى ثمن..!! الفكرة إن المكالمة دى كانت أول أيام عيد الفطر.. هيجيب عنوان "عبادة" ده منين بس..!!
🌹 إتصل بأخوه الشيخ انسان" وأخد منه رقم واحد إسمه "تامر" يعرف بيت "عبادة" وإتصل بيه وطلب منه إنه يقابله عشان يروحوا البيت له..!! "تامر" إستغرب من الطلب والتوقيت بس فعلاً قابل "خالد" ووداه لبيت "عبادة" اللى هو يعرفه فى الجيزة.. لما وصلوا إتفاجأوا إن "عبادة" إتطرد هو وأولاده من البيت عشان مدفعش الإيجار وإنه عزل وراح حتة إسمها "أبو هريره".. صمم "خالد" إنهم يطلعوا على هناك يدوروا عليه..!! راح فعلأ ووصل للحارة اللى ساكن فيها "عبادة" وطلع لهم وإستغرب إنه صمم يجيله لحد عنده و فى أول يوم العيد وبسرعة كده..
وبعد الكلام والحكي عرض عليه "خالد" إنه يجيبله محل يشتغل فيه بس "عبادة" رفض وقال إن المحلات ليها إلتزامات كتير وهو مش هيقدر عليها.. عرض "خالد" عليه إنه يجيب له عربية فول يشتغل عليها حتي..!! هنا "تامر" بيقول لـ "خالد" إن ده مستحيل لأن النهاردة أول يوم العيد وكل الناس قافلة!.. بيرد "خالد": ومين قال إنى أقصد عربية خشب..!! إحنا هنجيب له عربية سوزوكي صغيرة مستعملة عشان ما تاخدهاش البلديه وتنفع عياله لوحصل له حاجه ..
🌹 بدون ما يسيب فرصة لـ "عبادة" أو "تامر" للأعتراض بيتحرك "خالد" على منطقة الفرنساوي فى مصر القديمة وبيدور على عربية صغيرة مستعملة لحد ما بيلاقيها فى منطقة إسمها بلوك ورا مستشفي هرمل وبيقرر يخلص كل إجراءات الشراء ليها ووصي صاحب العربية إنه يسجلها بإسم "عبادة" بعد العيد ما يخلص..!!
"تامر" اللى حكى الموقف بيقول إن آخر كلمة قالها "خالد" بعد ما الموقف ده خلص: (مفيش حاجه تستحق السرعة والإستعجال في الدنيا دي إلا عمل الخير) ❤.
---------------------------------
👇
عن جبر الخواطر اتحدث ياساده ...
ادعوا للفنان خالد صالح بالرحمه والمغفره..
