متابعه وتقرير أحمد نصر الكريتي
مسئول العلاقات العامة بالقاهرة بالهيئة الوطنية للتوعية الفكرية اعلام الدفاع الوطني بموقع وجريدة الوطنية نيوز للصحافة والاعلام
كان عنده 3 صيدليات..
لو معاك 10 جنيه والروشته ب 300 تدفع العشرة وتاخد العلاج.
وقبل ما تمشي يقولك لو احتجت حاجه رن عليه في أي وقت.
.
لو فقيرة محتاجه تجهز بنتها يبعتها تختار الأجهزة من محل فلان وفلان يقولها الحساب مدفوع وتؤمري بأي حاجه تانيه.
.
لو مزنوق في قرشين تقدر تميل عليه وتطلبهم وأنت عارف إنه مش هيكسفك.
.
أيتام كتير كان متكفل بهم وأرامل وفقراء وبيته مفتوح للجميع.
.
كان الممول غير معروف لمسابقة حفظ القرآن الكريم بالقرية.
.
كان يقابل الفقير اللي بيشتري علاج بابتسامة ويحضر له الدواء ويقول له لك خصم 50٪ إجباري، ويبدأ في حلقة من الهزار لكي يطفئ الإحراج عن صاحب الهم .
.
كنت تروح له عايز علاج ضروري الساعه 3 بالليل وتتأسف بسبب إن الوقت متاخر يرد عليك بابتسامة قائلا:- آسف ليه ده شغلي ربنا سخرني علشان أكون كده في أي وقت أنا تحت أمرك.
.
50% من الأدوية مخصصة للفقراء والمحتاجين.
.
ولو الروشته فيها محاليل يقولك ويسألك :- فيه محاليل مين هيركب للمريضة المحاليل ؟ فتصمت فيتابع قائلا :- هاجي معاك علشان أشرف علي تركيبها، ومكنش بس بيركبها ويمشي بل كان يظل في المنزل حتى انتهاء المحلول بالكامل ويرفض الحصول علي ثمن الروشتة.
.
قال مرة لأرملة فقيرة علم أن لها بنتان تعالي في المكان الفلاني ولما راحت خدها لمحل تجهيز عرائس واشترى لها كل مايلزم لابنتيها كما تكفل بمصاريف النقل ثم رحل وتركها بعد أن أزاح عنها هم تكاليف تجهيز البنتين.
.
خرجت قريته شبلنجة التابعة لمركز بنها كاملة والقرى المجاورة لها في جنازة لم تشهد القرية مثيلا لها بعد أن وصل الجثمان إلى قبره والمشيعون من كثرتهم لازالوا أمام المسجد
.
توفى الدكتور محمد بعد تعرضه لحادث سير على طريق الفيوم الصحراوي،
هذه هي الأمثلة التي يجب أن يراها أطفالنا وشبابنا.
اللهم اغفر له وارحمه وتجاوز عن سيئاته واجعل قبره روضة من رياض الجنة .
