📇📚📖النهاردة العيد القومي لمدينتنا الإسكندرية.. المدينة اللى عمرها يزيد عن 2500 سنة.. مش بس عمرها.. عمر شوارعها.. أصل لما الإسكندر الأكبر خطط مدينتنا عمل شارعين رئيسيين في المدينة، الأول طريق بعرضها اسمه "الطريق الكانوبي"، والتاني طريق بطولها موازي لشاطئ البحر، والثاني يقطع المدينة من الجنوب إلى الشمال، ويسمى "طريق السوما".. ويتقاطعان بوسط المدينة..
الشارعين دول لسه موجودين لغاية النهاردة، الطريق الكانوبي هو "شارع فؤاد"، وطريق "السوما" هو شارع النبي دانيال، علشان يكونوا أقدم شارعين في التاريخ..
التراب اللى تحت رجلي ورجلك في إسكندرية مختلف عن أي مدينة تانية في العالم، تراب تحتيه خمس عصور، يوناني وروماني وفارسي وإسلامي.. تحتنا في الشوارع لما بنمشي توابيت، وجدران معابد ومقابر، وأسرار وحكايات..
من إسكندرية حكم محمد علي مصر لمدة 5 شهور في السنة، وقابل قناصل دول العالم، وعقد الاتفاقات، وسير الجيوش، علشان تبدأ قصة مصر الحديثة الجديدة..
في اسكندرية العصر الحديث اتقابل اليوناني والإيطالي والفرنسي مع المصري، فصنعوا نهضة حضارية بيتحاكى بيها العالم، منها أسس الشوام، بشارة وسليم تقلا أقدم جريدة في الوطن العربي وهي الأهرام، ومنها كتب اليوناني كفافيس أشعاره اللى لفت العالم كله، وفيها كتب الإنجليزي لورانس داريل رواياته اللى أصبحت أشهر روايات في التاريخ، ومنها خرج عظماء الفن، عمر الشريف، ويوسف شاهين، وهند رستم وغيرهم..
ساعات التاريخ بييجي على اسكندرية، والزمن ممكن يتغير عليها حبة، ساعات بتتعب وبنزعل على حالها لكن رغم كل شيء، عمرها ما فقدت سحرها، ولا فقدت روحها، بتفضل حتى في أصعب أحوالها جميلة، ويفضل فيها حاجة غريبة جدا.. إن الناس بتيجي هنا علشان ترتاح، وتحس إن الحياة أجمل وأسهل..
كل سنة وكل إسكندراني بخير، صحفى إسماعيل عباس الشريف
