من 200 سنة كان شارع الشريفين و طلعت حرب و قصر النيل و البنك المركزي و مربع البورصة هم المركز المالي للاقتصاد المصري
في آواخر عصر مبارك بدأت تظهر محاولات "غير مخططة" لإنشاء مركز مالي جديد بعيد عن القاهرة الخديوية نتج عن المحاولات دي شارع التسعين بمدينة القاهرة الجديدة
انهاردة بنعمل مركز مالي عالمي على غرار حي المال و الأعمال في لندن Canary Wharf و حي المال و الأعمال الأمريكي في منهاتن
حي المال و الأعمال Central Business District بالعاصمة المصرية الجديدة هيكون الأكبر من نوعه في الشرق الأوسط و أفريقيا هيضم أكتر من 70 برج و ناطحة مخصصة للأعمال الإدارية و التجارية وده بخلاف الحدائق و المباني الخدمية و علامات فندقية فاخرة هتفتح أبوابها وتقدم خدماتها لأول مرة في السوق المصري
تاريخيًا وعلى مدار 7000 سنة كان مع كل انتقال لعاصمة مصر ضروري كان بيتبعه انتقال للنفوذ و الثروة و السلطة و حركة التجارة اهو احنا انهاردة بنعيش النقلة التاريخية للعاصمة و النفوذ و الثروة بمفهومها الجديد
حي المال و الأعمال هيكون مركز للاقتصاد المصري على الأقل ل 200 سنة قدام على ما تبدأ النقلة الجديدة وقتها ، لحد دلوقتي تم ازاحة الستار عن عدد قليل من الأبراج و الناطحات المخطط و الجاري تنفيذها في المركز لمالي الجديد كان أهمها
-برج الأيقونة بارتفاع 400م
-برج انفنتي بارتفاع 200م
-برج دايموند بارتفاع 200م
-برج تاچ مصر بارتفاع 200م
-برج ايست تاور بارتفاع 180م
-برج سيكستي بارتفاع 160م
-برج دابل تو تاور بارتفاع 100م
-برج كوان بارتفاع 100م
-برج تريتون بارتفاع 70م
-برج سنترال بارتفاع 70م
-برج ايڤولڤ بارتفاع 70م
-برج باڤو بارتفاع 60م
حي المال و الأعمال هيكون عنوان للاقتصاد المصري و مقر اقليمي لكبرى الشركات المصرية و العالمية خصوصًا انه يبعد تقريبًا ربع ساعة بالقطار الألماني السريع عن قناة السويس و المنطقة اللوجيستية و المناطق الصناعية بمحور القناة و ميناء السخنة الجاري توسعته حاليًا عشان يكون الأكبر في افريقيا و على البحر الأحمر
بيخدم على حي المال و الأعمال محطة مونوريل القطار المُعلق القادم من قلب القاهرة ، و محطة مركزية عملاقة للقطار الكهربائي و المونوريل وده عشان يربط الشركات في حي المال و الأعمال بالمناطق الصناعية في الروبيكي و بدر و العاشر من رمضان و العبور وغيرها
انهاردة بنربط مقار الشركات بالمصانع و بالموانىء ، بنية تحتية عملاقة وضخمة للمال و الأعمال هتساهم في جذب أضعاف أضعاف الاستثمار الأجنبي اللي بيدخل مصر و يهيأ المناخ الاستثماري لرجال الأعمال لزيادة تجارتهم و أنشطتهم في مصر
انهاردة بنكتب فصل جديد من تاريخنا العظيم و بنرسم طريق هنفضل ماشين عليه لعقود طووويلة.
