***************************
روسيا بتعيد تشكيل مفهوم القوى العالمية في العالم بعيدا عن مسميات القطب الأوحد والثنائية القطبية وبتقول عصر أمريكا أنتهي؟
روسيا أعلنت يوم الخميس ٢٤ فبراير، أنّ "البنى التحتية العسكرية للقواعد الجوية التابعة للقوات المسلحة الأوكرانية توقفت عن العمل".
الغريب هنا انها قالت انها استخدمت معدات واسلحه مش بتضر بأمن المواطنين لكن بنعطل وبنشل البنى التحتية لأوكرانيا المدعومة من أمريكا وفي ضهرها حلف الناتو (إلي مخدش اي رد فعل رغم أنه ورد اسلحه متطورة لأوكرانيا)
روسيا واخدة الصراع مع أوكرانيا في حته تانيه خالص..وبتستخدم تقنية جديدة في الاسلحة ومتطورة جدا .. وقالت ان اي تدخل اجنبي هتواجهه بكل قوة (يعني خلاص مش باقية على حاجه)
طيب السؤال المهم إلي شاغلنا كلنا مصر وضعها ايه من الهجوم ده (هتتأثر ولا هتستفيد؟)
حقيقي السؤال ده صعب شوية علشان مصر هتتأثر من جهة وهتستفيد من جهة تانية
التأثر هيكون في السياحة وده لأن السائح الأوكراني والروسي من أكبر الشرائح إلى بتعتمد عليهم السياحة في مصر وده طبعا هيتوقف تدفقهم أثناء الحرب أوحتى التوتر... بالإضافة إلى إن روسيا أكبر مورد للقمح لمصر واكيد الحرب هتأثر على التدفقات دي(جني المحصول في يناير) ووارد يخلق ازمة (بس مصر عندها احتياطي يكفي لغاية نوفمبر ومعتقدش أن الحرب هتستمر كل الفتره دي)... النقطه المهمة أن أسعار البترول بترتفع جدا وده هيأثر على الولايات المتحدة الأمريكية إلي هتضطر تزود الفايدة علشان تحمي الاقتصاد بتاعتها وده هيأثر بموجه غلاء اسعار كبيرة جدا على مستوى العالم الي بيعتمد على الدولار كعملة اساسية والي اصلا كان بيعاني من من موجة تضخم كبيرة ..فهتلاقياسعار الشحن والتأمين والدهب غلي جدا وكذالك اسعار السلع وده هيأثر على مصر بصورة كبيرة برضو
المكسب هيتمثل في أن الحرب هتبقي فرصة لمصر في مجال الغاز ...لأن مصر عندها اكتفاء ذاتي من الغاز وعندها مخزون كبير للتصدير إلي هيكون عليه طلب خاصة في الدول الأوربية إلي بتعتمد على أوكرانيا بصورة كبيرة في احتياجاتها للغاز. (والي اعتقد هيكون ليها دور في الحرب على أوكرانيا قريبا لو الوضع استمر بالشكل ده)
الحرب الروسية الأوكرانية ممكن تتحول لحرب عالمية ثالثه في اي وقت لأن العالم كله متضرر حرفيا... ربنا يستر ويحفظ بلدنا
