***************************
فيه حكاية حلوة من امبارح ليها صدى في كتير من وسائل الإعلام العالمية والعربية بطلها الشاب المصري اللي في الصورة واسمه إسلام العشيري واللي عايش في أوكرانيا واللي برضه عمل تصرف ابن ناس في منتهى الجدعنة..
الموضوع بدأ إن فيه أب يمني سافر من أوكرانيا رجع اليمن وساب مراته وأولاده الإتنين كريم وأمير في بيتهم في قرية أوكرانية بس طبعاً بعد ما الأحداث الأخيرة حصلت ما قدرش يرجع يجيبهم لإن الدنيا كانت قفلت خالص!
الراجل كان هيموت من القلق على أولاده ومفيش في إيده حاجة يعملها والقرية اللي هو سايبهم فيها بتتعرض للضرب المتواصل طب والحل؟ عمل مداخلات في وسائل إعلامية كتيرة وعلى السوشيال ميديا وهو بيصرخ وبيعيط بيطلب من أى مسؤول أو شخص عادي إنه يلحق مراته وأولاده اللي موجودين في القرية الفلانية وينقذهم طيب يا عم دي الدنيا مقلوبة والناس في إيه ولا في إيه وهو فيه حد فاضي أصلاً ينقذلك عيالك ومراتك!
في نفس اللحظة كان فيه شاب مصري اسمه إسلام موجود في غرب أوكرانيا في مدينة بعيدة كتير عن القرية وبيتفرج على التليفزيون وشاف مناشدة الأب اليمني ده بدون تفكير ولا حسابات وبجدعنة المصريين ولاد البلد حفظ إسلام العنوان اللي الأب بيردده بهيستيريا وقام ركب عربيته وقرر يروح لمكان البيت في قرية كاماركوف تروح فين يا عم أنت مجنون مش هسيبهم وفيه في إيدي حاجة ممكن أعملها أنت تعرف الراجل لأ طيب هو عارض مكافأة مثلاً ولا حاجة للي ينقذ عياله؟ لأ برضه أنا هعمل كذا عشان عايز أعمله ماسمحش لحد إنه يمنعه واتحرك فوراً قطع مسافة قد إيه؟ 500 كيلومتر يعني سواقة لمدة حوالي 5 ساعات وسط ضرب وخطر ومطاردات لحد ما وصل وصول إسلام للقرية والبيت كان معجزة أصلاً وفي التوقيت المناسب لإنه لقى الطفلين أصلاً مستخبيين جوا بيت خشبي بعد ما معظم البيوت اتدمرت والله أعلم لو كان اتأخر كان إيه اللي ممكن يحصل جاب الولدين ووالدتهم وركبهم معاه العربية واتحرك بيهم في اتجاه أقرب نقطة أمان اللي كانت برضه على بعد مئات الكيلومترات عشان يسافروا لوالدهم بالسلامة..
جدعنة إسلام كانت سبب من تدبير ربنا إن حياة الطفلين دول يتم إنقاذها جدع مصري ابن حلال وواحد من الناس اللي تنبسط لما تعرفهم وتتشرف بيهم وتكون متأكد إن بيه وباللي زيه الدنيا لسه بخير.. كل الحب والله.❤️
مصر بخير
والمصريين طول عمرهم جدعان
خليك ايجابي
