★اللواء.أ.ح. سامى محمد شلتوت.
•عندما أتصرف أو أتحرك أو أسكت وعندما أتكلم وأتنفس .كل سكناتى وحركاتى وتصرفاتى هى نتاج تعليم أمى رحمة الله عليها. هى من علمتنى دينى ودنياى وتقاليد بيئتى الريفية وعراقة عائلتى علمتنى الإنسانية والرأفة والحنان والأحترام .فهى مدرستى الأولى والأخيرة.كانت لا تنتقدنى لم أتذكر مرة أنها كلمتنى بصوت مرتفع أو صارخة. ولم ترفع يديها ضاربة لى ...سكوتها كان يزلزل كيانى خشية أن تكون بها غضب على أو إمتعاض من تصرف لى لم تهددنى مرة طوال عمرها لم تقسوا على فتعلمت الرحمة والرفق . بل تعطينى الدرس فى قصة أو كلمات علمتنى الشموخ وعزة النفس وتحقيق الذات والمثابرة والرجولة حتى وأنا طفل عودتنى على الإلتزام وإحترامى لنفسى وغيرى.
لم أتعلم سوء التصرف إلا بعد وفاتها وإحتكاكى بالبشر أثناء مسيرة حياتى. أسترجع بعض من كلماتها بنفس البساطة والتلقائية لسيدة ريفية من عائلة عريقة نشأت هى وأبى في بيت واحد لأخوين شقيقين.نسترجع هذه الكلمات التى ترن فى إذنى وأتذكر ضحكتها وسعادتها عندما كنت أعود بنتيجة صفى متفوقاً على أقرانى وأكون الأول عليهم .كنت أجتهد لأرى فرحتها وفخرها بى. تربى جيلى وأنا رجل فى بداية الستين من عمري بأسلوب مختلف تماماً بواسطة أمهات عظيمات.
يا أبنى:
• لما تزور حد والحد ده ساكن في مكان بعيد والطريق لبيته زحمة أو مكسر ... مفيش داعي تحسسه أنك إتبهدلت عشان تزوره ،.. هو بيبقي حاسس بالإحراج لوحده ... هو عارف أن المنطقة اللي هو عايش فيها زحمة ومكسرة ... وهو لو كان بإيده أنه يسكن في مكان أحسن كان عمل كده.
• لما تزور حد بيته أو شقته ضيقة أو الجو فيها حر ... مفيش داعي كل شوية تتكلم عن شقتك الواسعة وتتكلم عن أهمية البراح والوسع و....و ... مش لازم تنغص عليه حياته .... هو لو كان قادر يشتري قصر ماكنش إتأخر.... هون عليه وحسسه أن بيته أو شقته جميلة وفيها بركة رغم أنها مش كبيرة ومش مجهزة.
• مفيش داعي تهزر مع حد بكلام أنت عارف أنه بيضايقه لمجرد أنك بتستمتع بده.... للأسف في ناس بتتبسط لما تشوف اللي قصادها محروق دمه ومضايق.
• مفيش داعي كل ما تشوف صاحبك تفكره أنه تخين وشكله وحش.... هو حافظ شكله كويس ومضايق منه.... لو عندك نصيحة تنفعه في مشكلته وهو هيقبلها قولهاله ... غير كده بلاش تحرجه.
• مفيش داعي تتكلم عن مدرسة ولادك الغالية النضيفة اللي بتعمل أنشطة كتير قصاد واحد ظروفه المادية إضطرته يودي ولاده مدرسة متواضعة جداً.
• مفيش داعي تتكلم عن ممتلكاتك وإزاي هي بتسهل عليك حياتك قصاد واحد طلعان عين اللي جبوه في الحياة كل يوم.
• بلاش تتباهى بعائلتك ونسبك وعزوتك .لأن ده بقلل منك وينفر الناس منك.
• أجعل تصرفاتك وأخلاقك خير سفير لى وأنى أحسنت تربيتك أجعل الناس تدعوا لى على تربيتك وحسن خلقك.
• الانسان بطبيعته بيحب يحس بالتميز ... وبيحب اللي حواليه يحسوا بتميزه ده.. وأحيانا شعوره بالتميز بيبقي مرهون أنه يشوفه في عيون الآخرين .. بس الأسلوب ده ممكن يكسر قلوب ناس حوالينا وينغص عليهم حياتهم.
٭رحمة الله على مدرستى الأولى والأخيرة فى الحياة رغم حصولى على العديد من الشهادات التعلمية وصولاً إلى أعلى مستوى تعليمى أكاديمى فى مجال تخصصي.إلاأنها سوف تظل نبراس حياتى وملهمتى فى الحياة....
تقبلها الله وجميع أمهاتنا فى جنان عالية والفردوس الاعلى. منعمين فيها برحمه الله لا بأعمالنا ولا أعمالهم.
