مدير إعلام الدفاع الوطنى
عمو يا بتاع المسلسلات.. عايز تعمل أعمال دينية..؟!! وماله .. تعالى اقولك ممكن تعمل إيه..!! احنا مصر يابرنس.. عارف مصر طبعا .. عندك ياسيدى حاكم مصر هو اول مَن اطلق عليه لقب خادم الحرمين الشريفين .. هو اللى كان بيحمى الحجيج وقت الحج ويشوف طلباتهم ويصرف عليهم كمان.. مش الحجيج او الحُجاج المصريين لا يا برنس ده كل الحجاج المسلمين كانوا مسئولين منه بصفته حاكم مصر وخادم الحرمين.. تفتكر كام مصرى عموما ومسلم عموما يعرفوا المعلومة التاريخيه اللى مابتتقالش وكأنها سر عسكرى مثلا..؟!!
عارف ياعمو الشيخ الشعراوى الله يرحمه قال عباره كده بتقول مصر التي صدرت علم الاسلام إلي الدنيا كلها ، صدرته حتي إلي البلد التي نزل فيها الاسلام , هي التي صدرت إلي علماء الدنيا علم الإسلام .. عارف ياعمو.. مافيش عمل واحد شرح الكلام ده للناس..؟!! مافيش عمل واحد يقول للناس ازاى الاسلام اتحول اصلا لعلم ومصر واهلها وعلماؤها عملوا ايه بالظبط وازاى صدروه للبلد اللى نزل فيها الإسلام نفسه..؟!! الناس بتردد الكلام ده ممكن من الفرحة او الفخر لكن الغالبية العظمى منهم لو سألتهم عن التفاصيل مش هيعرفوا يجاوبوا ويردوا عليك..!!
طيب عارف يا عمو .. فيه مسلسل عن الامام الشافعى بطولة خالد النبوى وهيبقى تحفه أكيد.. بس هل عندك علم ان د/ على جمعه ايام ماكان مفتى وهو اصلا شافعى المذهب بس لما استدل بجواز ترميم وبناء الكنائس وعدم هدمها استدل بكلام الامام المصرى الليث بن سعد مش الامام الشافعى..!! الليث اللى الشافعى نفسه قال عنه انه افقه من مالك مع ان مالك هو استاذ الشافعى..!! الليث اللى مصريين طيبين كتير بيروحوا يزوروا مقامه ومايعرفوش مين ده وفاكرين انه من آل البيت..!! الليث اللى الشافعى قال انه افقه من مالك لكن اهله أضاعوه..!! تخيل يا عمو ان اهله (المصريين) سايبين سيرته العظيمه دى ضايعه لغايه النهاردة لدرجة ياعمو ان فيه اللى بيقولوا عنه مش مصرى أصلًا..!!
طيب عارف ياعمو ان يوسف زيدان قال ان مصر بقيادة قطز ماكسبوش التتار او المغول ولا حاجه واحنا كل اللى حيلتنا فيلم وا اسلاماه انا هنا يا سلامه ومسلسل الفرسان واستاذ احمد عبد العزيز بيموت بالبطئ فى النهاية .. حاجات الجيل ده عاملها كومكسات لانها مش مناسبه له..!! اتحداك يا عمو تجيبلى الدور الحقيقى اللى قام بيه الشيخ العز بن عبد السلام فى الزمن ده..!!
◾️◾️◾️◾️◾️
ازيدك من الشعر بيتين ياعمو مش بيت واحد..؟ عندنا فى مصر هنا فيه مسيحيين.. اه وربنا زيمقولك كده..!! تاريخ الكنيسه المصرية بتاعتنا دى يشرف كوكب باللى فيه .. بس سلو بلدنا مشهد شيخ وقسيس وعاش الهلال مع الصليب وشكرا..!!
طيب اقولك ياعمو على حاجه كان عندنا بابا للكنيسه هنا فى مصر اسمه كيرلس الخامس الراجل العظيم ده عارض المندوب السامى البريطانى اللى كان عايز يحط الكنيسة القبطية تحت الحماية البريطانية وبسبب معارضته دى وعدم تنفيذه لطلبات اللورد كرومر تم إبعاده ونفيه ولا فرق معاه ورجع تانى أقوى من الأول...!! ده مش كلامى .. وده اللى سجله المؤرخ البريطانى ليدر لما قال " لقد عاد البطريرك من منفاه كعملاق تجدد نشاطه، وعملاق أيضا استخدم نفوذه وسلطانه.
الراجل ده مصريته ووطنيته هى اللى خلته يواجه هى اللى خلته
يحافظ على قومية الكنيسة وهويتها المصرية لدرجة إن كرومر نفسه كتب فى كتابه "مصر الحديثة" إن الفرق الوحيد بين القبطى والمسلم هو أن الأول يعبد الله في كنيسته والثانى في مسجده ولا نستطيع أن نفرق بينهما...!!
وكمان يا عمو مساندته لثورة 19 لدرجة إن الزعيم سعد زغلول قال: لولا وطنية الأقباط وبطريركهم كيرلس الخامس وإخلاصهم الشديد وحبهم لوطنهم لتقبلوا دعوة الأجنبى للوقوف بجانبه، ولفازوا بالجاه والسلطان والمناصب الكبيرة بدلا من النفى والسجن والاعتقال، لكنهم فضلوا أن يكونوا مصريين معذبين محرومين من المناصب والجاه ويذوقون الموت والظلم على أن يكونوا محميين بأعدائهم وأعدائكم...!!! ده موقف لشخصية واحده من التاريخ...!!! هل عموم المصريين يعرفوا الكلام ده دلوقتى...؟!!
بلاش.. طيب عارف ياعم مين علم اوروبا النظافة..؟!! اقولك .. كان عندنا قديسة مصرية صعيدية إسمها "ڤيرينا" هو دى بقى اللى علمت اوروبا النظافة..!! هى اللى لما لاحظت جهل أجداد الأوروبيين بالمبادئ الأساسية للنظافة والقواعد الصحية علّمتهم النظافة الجسدية والطهارة وتسريح الشعر والاستحمام والاهتمام بالنفس دى حتى علمتهم ازاى يسرحوا شعرهم ويقتلوا حشرات الرأس...!!! اه مايغركش اللى بتشوفوا دلوقتى دول كانوا مقملين والغريب بقى ياعم ان المؤرخين ورجال الدين والمثقفين هناك عارفين ومعترفين إن اللى علمت الاوروبيين النظافة كانت واحدة مصرية .. لكن هنا ياعمو غالبية المصريين اللى هم اهلها وهى واحده منهم مايعرفوش حاجه عن الكلام ده..!!
القصص كتير ياعمو بس للى يفهم ويبقى عنده دم وضمير وعايز فعلا يعمل وعى حقيقى ويخلى المصريين يعرفوا هم مين بجد اه والله زى مابقولك كده..!! دوشتك بكلامى انا عارف بس معلش خليها عليك وفكر كده واتمنى اشوف اى حاجه من المكتوبه دى بتتعمل على رمضان السنه الجايه ولا حاجه ومش لازم المكتوب بالظبط احنا عندنا كتير اوى كتير لدرجه ان من دلوقتى ليوم القيامه مش هتلحق تعمل كل حاجه.. ماهو احنا مصر ياعمو..!
