..بقلم .
م. ممدوح البرهاني
-----
اتفقنا قبل كده .. ان حرب الجيل الرابع هي حرب نفسية شاملة موجهة ضد الشعوب ،
الجميع فيها مستهدف سواء كبير او صغير
و ان الحرب دي بالذات .. بتستخدم فيها كل الوسائل المتاحة للسيطرة على العقول بهدف ان الانسان يدمر نفسه وبلده بنفسه ،
وان أي وسيلة من الوسائل دي بتسيطر على عقلك اذا دخلت في مرحلة الإدمان الفكري
والإدمان بيحصل لما بيرتبط العقل بالوسيلة عن طريق محفزات مبهرة وجاذبة للانتباه
ندخل بقى في الموضوع على طول .. هل الألعاب الإلكترونية فيها محفزات مبهرة وجاذبة للإنتباه ؟
- ايه الكروتة دي ؟ انا لسة مفهمتش يعني ايه محفزات مبهرة وجاذبة للانتباه !؟
= طيب .. نجيب الموضوع من الأول ..
عشان الإنسان يبقى مدمن لازم يتوافر عنصرين :
المحفز والمكافأة،
المحفز هو تعرض الشخص المتكرر لنشاط معين،
و المكافأة هي اقتناع الشخص بأن المحفز ده هو شيء إيجابي في حد ذاته وسبب مهم للإحساس بالسعادة.
يعني العنصرين لازم يكونوا وجهين لعملة واحدة ، مينفعش تعرض مستمر لمحفز بدون مكافأة ، ومينفعش مكافأة تحصل مرة واحدة فقط بدون تكرار ..
وإلا مش هيحصل الإدمان !
هو ده معنى المحفز المبهر الجاذب للانتباه
- لحظة واحدة .. أنا فهمت اللى فات .. بس برضو لسة بحاول استوعب حكاية المكافأة دي
= ببساطة ، المكافأة هي شعور إيجابي وإحساس بالسعادة بيشجعك تكرر التجربة تاني ، الإحساس ده مصدره منطقة معينة في المخ ، بيتحكم فيها هرمون الدوبامين اللي بنسميه هرمون السعادة ، لما بتتعرض لمحفز مبهر يزود إفراز هرمون الدوبامين في مخك .. تلقائيا انت هتحس بالسعادة .. وتلقائيا منطقة المكافأة في مخك هتنشط وتشجعك تكرر التجربة تاني .. ومنطقة اتخاذ القرارات هتكسل .. وتلاقي نفسك مش قادر تبعد عن المحفز رغم معرفتك انه ضار ، وهو ده بالظبط معنى الإدمان .
- تمام انا كده فهمت ، نرجع بقى للسؤال الأول ونجاوب عليه : ايه المحفزات المبهرة في الالعاب دي ؟
= مهم جدا تعرف ان الشركات المنتجة للألعاب دي بتتنافس مع بعضها لانتاج ألعاب أحدث وافضل وبتصرف على الحكاية دي مليارات المليارات ، بحيث انها تكون جذابة و تناسب كل الأذواق ومختلف الأعمار ، وتتقدم لجمهور كبير وواسع ومتعدد الاهتمامات..
ولو تفتكر موضوع الأبواب الآمنة لعقلك اللى اتكلمنا عنه قبل كده ، هتعرف ليه ناس كتير بتنجذب للألعاب دي وتدمنها ،
- بصراحة .. انا فاكر بس مش واخد بالي .. ايه موضوع الأبواب الآمنة ده ؟
= بص يا سيدي ، الأبواب هي ( المداخل ) اللي عقلك بيستقبل من خلالها أي مؤثرات أو معلومات ،
المداخل دي كتير لكن بشكل عام هما منقسمين قسمين ، مداخل آمنة تخلي المعلومة ( مقبولة ) .. ومداخل خطرة تخلي المعلومة ( مرفوضة )
وأنا استخدمت تسمية أبواب لأن الباب تقدر تقفله أو تفتحه حسب مناعتك أو استعدادك النفسي .. يعني حسب وعيك أو تأثرك ،
وأي وسيلة من وسائل السيطرة على العقول ، لازم تدخل عن طريق مدخل أو باب آمن ، عشان تكون مقبولة بالنسبالك ومع الوقت تدخلك في دايرة الإدمان وتتحكم في تصرفاتك .
طيب ايه الأبواب اللى ممكن تدخلك منها الألعاب الإلكترونية ؟
مثلا من باب انك ( بتعبر عن نفسك وشخصيتك ) ودي فرصة بتلاقيها في عالم الألعاب الافتراضي أكتر من الواقع .
أو من باب انك بتاخد ( مكافأة فورية ) وانت بتلعب ومأنتخ ، جايز صعب تلاقي زيها في الواقع وانت بتشتغل وتعبان ،
أو من باب انك عايز ( تهرب من الواقع ) وتبعد عن مشكلات الحياة لان اللعب بياخدك لعوالم تانية جديدة وغريبة
أو من باب انك ( تشغل وقت فراغك ) عشان الألعاب الجماعية مفهاش نهاية محددة بانتهاء اللعبة، خاصة مع الالعاب اللى بتتفرع فيها القصة وتتشعب كل ما تتقدم في المراحل
أو من باب ( الاحساس بالنشوة والقوة ) اللي بتفتقدها في الواقع.
أو من باب ( قتل حالة الفراغ المادي والشخصي ) اللي بيعانى منها كتير من الاشخاص خاصة في فترة المراهقة .
أو من باب ( التجديد والتحفيز الدائم ) اللى بتتقنه شركات انتاج الالعاب الالكترونية
أو من باب ( الاحساس بروح الفريق والتواصل مع الناس ) خاصة لو بتلعب لعبة جماعية اون لاين
أو من باب ( الفضول وحب الاستكشاف والمغامرة )
أو حتى من باب ( التسلية )
- إزاي بقى بتتحول الألعاب الإلكترونية لإدمان ؟
= الألعاب الالكترونية بتسبب إفراز "الدوبامين" زيها زي أي مادة مخدرة ، بالإضافة الى ان ليها تأثير يشبه تأثير مادة "الأمفيتامين" و مادة "الميثيلفينيديت" ، و اللي هي أساسا مخدرات بتستخدم عادة -تحت الإشراف الطبي- لعلاج اضطراب فرط الحركة ونقص الانتباه ومرض الخدار،
و المعروف أنها لو استخدمت بعيد عن الإشراف الطبي بيكون ليها تداعيات خطيرة على الصحة ، زي مثلا فقدان القدرة المعرفية والحرمان من النوم و طبعا ( الإدمان ) ،
وده كلام علمي حقيقي ، ولو بحثت هتعرف ان منظمة الصحة العالمية سنة ٢٠١٩ قررت إدراج إدمان الألعاب كاضطراب نفسي و صنفته مرض خطير ينبغي العلاج منه .
عادة بيبدأ الموضوع بجرعة بسيطة، لما بيتعرف الشخص على الألعاب دي ، وخصوصا لو كان طفل في سن مبكرة ، المخ بيعتبر الألعاب دي ( مكافأة ) بتسبب السعادة والشعور بالإنجاز ، فيبدأ مركز المكافأة في المخ يدفع الإنسان لتكرار التجربة تاني عشان يفرز الدوبامين أو هرمون السعادة أكتر ، وتتحول التجربة ( لاعتياد ) .. ومع التكرار يتحول الاعتياد لـ( سلوك ) ومع الاستمرار لفترات طويلة جدا يصبح المخ في حالة ( إحتياج ) الألعاب الإلكترونية زيها زي أي مادة مخدرة ، ويحصل الإدمان ..
- طيب معلش .. إزاي أعرف إني أدمنت الألعاب الإلكترونية ؟
= في أعراض واضحة لإدمان الألعاب الإلكترونية ، ممكن تلاحظها في الكبار وفي الأطفال خاصة .. زي مثلا :
- التعلق بالأجهزة الإلكترونية سواء الموبايل أو الكمبيوتر او البلايستيشن
- الانفصال عن الواقع وعدم الرغبة فى الخروج للأماكن المفتوحة أو الاختلاط بالآخرين ،
- تغير الطباع .. العناد والتشنجات والتوتر ٤- فقدان الروابط الاجتماعية بسبب العنف و مهاجمة الآخرين
- فقدان التركيز عند المراهقين.
- الإهمال والتأخر الدراسي الواضح.
- خلق حجج وأعذار طول الوقت.
- البحث عن مصدر أموال عشان السايبر أو البلايستيشن
- التحايل والكذب للهروب من تساؤلات الأم والأب.
- فقدان الشهية ونقصان الوزن.
- العصبية والإفراط فى تبرير المواقف.
- التفكير في الألعاب الإلكترونية طول الوقت
- الشعور بالراحة والسعادة وقت اللعب بس و الشعور بالملل والإحباط في أي وقت تاني
- عدم القدرة على تقليل ساعات اللعب.
- الانسحاب من نشاطات كنت بتأديتها قبل كده ، عشان تتفرغ للألعاب.
- ظهور مشاكل في دراستك أو عملك بسبب اللعب لفترات طويلة.
- استمرارك في اللعب على الرغم من وجود مشاكل كبيرة في حياتك
- استخدام الألعاب الإلكترونية عشان تتخلص من الاكتئاب والمزاج السيء
- إنكار إنك بتقضي مدة طويلة في اللعب وإنكار إنك مش قادر تمنع نفسك عنها
- بس هنا في سؤال مهم .. أنا لو وصلت لإدمان الألعاب دي .. فأكيد عشان في أسباب تانية وصلتني لكده
= ده صحيح .. ومن أسباب إدمان الألعاب الإلكترونية :
العزلة ( و خاصة قلة تواصل الأهل مع الأبناء).
الفراغ (وخاصة عند المراهقين ).
البحث عن السعادة (النشوة اللى بتحققها الألعاب الإلكترونية )
الهروب ( من مشكلات الواقع لعالم الألعاب المبهر )
الاحترافية (الأداة اللي بتستخدمها شركات الألعاب للتحفيز والإدمان )
الإهمال (بسبب انشغال الأهل و إلهاء الأطفال بالألعاب طول الوقت )
غياب الرقابة ( سواء من الأهل في البيت أو من المربيين والمعلمين في المؤسسات التربوية والتعليمية )
التقليد الأعمى ( خصوصا مع غياب القدوة والمثل الأعلى )
الفضول ( خصوصا مع وجود دعاية ضخمة وقوية للألعاب )
- ماشي .. بس بصراحة بقى .. أنا حاسس ان إدمان الألعاب الإلكترونية ده ممكن يكون حاجة عادية مش وحشة
= شوف الأضرار بقى وبعدين احكم بنفسك هي حاجة عادية ولا مرض خطير ،
أضرار جسدية:
آلام أسفل الظهر و الفقرات القطنية
آلام الرقبة
خمول فى العضلات
ضعف عضلات المثانة
احمرار العين وضعف النظر
إمساك مزمن
فقدان الشهية ونقص الوزن
أضرار نفسية:
القلق والتوتر
الاكتئاب
اضطرابات النوم
العنف والعدوانية
فوبيا الإصابة بالأمراض
التأخر الدراسي وضعف التحصيل العلمي
إهمال التواصل
الفصام
تعاطي المخدرات والكحول
الانتحار
التكلفة الاقتصادية العالية اللي بتتكلفها الاسرة نتيجة ادمان واحد من افرادها للالعاب الالكترونية.
** بالإضافة للأفكار والسلوكيات الخبيثة اللى هتدخل لعقل الشخص مدمن الألعاب دي وهيقتنع بيها وينفذها مع الوقت بدون ما يشعر ولا ياخد باله ،
الافكار والسلوكيات الخبيثة دي كتير ، وبتكون موجودة في الألعاب فعلا بشكل غير مباشر أو مخفي ، لكن بتدخل العقل وبيستوعبها ويتعود عليها مع الوقت والتكرار المستمر ، و ده أهم هدف بيخلى الألعاب الالكترونية وسيلة قوية من وسائل حرب الجيل الرابع .. خاصة إنها كمان مرتبطة بوسائل تانية زي مثلا مواقع التواصل الاجتماعي و أفلام السينما والكرتون
- طيب لو حد بقى مدمن ألعاب إلكترونية فعلا .. ممكن يتعالج منها إزاي ؟
= طبعا ممكن يتعالج .. بشرط واحد .. هو ( الاعتراف بالمشكلة ) ، يعني لازم يبقى فاهم كويس جدا ومعترف إنه ففعلا مدمن ألعاب ومحتاج علاج ،
وخاصة لو كان الشخص المدمن ده ( طفل ) لازم أهله يكونوا على قدر المسئولية ويعالجوه ،
والطريقة السليمة للعلاج هو اللجوء للطبيب أو المعالج النفسي ، مش منع الطفل من اللعب فجأة أو إجباره على تقليل ساعات اللعب ،
- طيب لو أنا مش عايز أروح لمعالج نفسي ؟؟
= لو كنت وصلت فعلا للإدمان لازم تروح ،
وبما ان الوقاية خير من العلاج ، في حاجات ممكن تعملها عشان تتجنب إدمان الألعاب الإلكترونية من البداية ، زي مثلا :
- الانخراط في نشاط آخر بجانب الألعاب الإلكترونية، زي القراءة أو الصيد أو العزف على آلة موسيقية أو الحيوانات الأليفة أو أي رياضة مفيدة للصحة العقلية والجسدية.
- حاول دايما تعمل جدول لعدد ساعات اللعب وحاول في نفس الوقت تقليل الساعات دي تدريجيا
- حاول تحط أدوات اللعب والموبايل في غرفة تانية غير غرفة نومك .
- حاول تعوض وقت فراغك بأنشطة حياتية مفيدة و بالعلاقات الاسرية الودية و الرحلات والفسح والأعمال التطوعية
- وبالنسبة للأطفال :
بلاش تشتري أجهزة ألعاب إلكترونية لطفل عمره أقل من ٦ سنوات ،
اختار ألعاب تناسب عمر الطفل وإبعد عن الألعاب المؤذية، اختار ألعاب تنمي قدرات التفكير وتزود مستوى الذكاء وتحسن مهاراته اللغوية و تعلمه مهارات حركية مفيدة،
بعض الألعاب الإلكترونية بتكون مفيدة فعلا وليها وظيفة علاجية لبعض الحالات زي ( الطيف التوحدي ) أو ( فرط الحركة وتشتت الانتباه )
إبعد عن التعنيف او الشدة مع إبنك عشان العنف ممكن يخليه يلجأ لأنواع تانية من الادمان أخطر من الألعاب ،
اكتشف مواهبه وحاول تطورها وتنميها ،
خليك انت صديق إبنك عشان يبعد عن أصدقاء السوء واختار له أصدقاء مهذبين ،
علمه نشاطات جديدة مفيدة و شاركه اهتماماته واختارله الأفضل منها ،
خصص له أوقات وساعات محددة للألعاب الالكترونية ،
وأهم من كل ده لازم تقرب من ابنك وتتناقش معاه و تعرف ايه المشاكل اللي بيعاني منها وتحاول تحلها لأنه ممكن يكون بيهرب من عالم الواقع لعالم الألعاب
--------
