***************************
- أيه بقا الحكاية دي ركز معايا يا السياسي الشاب ؟
أول امبارح #أمريكا قررت فرض عقوبات دبلوماسية على #الصين، فقامت بإيقاف منح التأشيرات لبعض الشخصيات الدبلوماسية الصينية لدخول امريكا ، وكذلك سحب ميزة الـ "VIP"من أفراد البعثة الدبلوماسية الصينية
والصين ردت على الإجراء ده بتطبيق نفس العقوبات بالضبط
وكمان اتخذت اجراء أشد قسوة وهو تجميد أسهم الشركات الأمريكية في البورصة الصينية
- بس العجيب بقا ان أمريكا لما وقعت العقوبات دي على الصين ماقالتش انها عملت كده عشان الصين بتدعم روسيا ولا حاجة
أبسوليوتلي ، دا بيان مجلس الأمن القومي الأمريكي قال نصا: ان الولايات المتحدة قررت فرض عقوبات على الصين لأنها بتضطهد أقلية «الإيجور» و تعادي الاسلام !!وبرضو وفي نفس البيان توعدوا دولة"ميانمار"بتوقيع عقوبات شديدة عليها عشان هي كمان بتضطهد أقلية «الروهينجا» المسلمة وبتعادي الإسلام
وما تعرفش إزاي الشيكا بيكا اللي مخلصة على نصف مليار مسلم من بداية تأسيسها لحد من نص ساعة فجأة طلع لها دقن وزبيبة صلاة وبقت بتتشحتف وبتقطع هدومها وبتتأوه على حقوق المسلمين ؟
- طاب إيه الحكاية يلا بينا نعرف الحكاية ؟
- الصين العملاقة دي بالرغم من اتساعها إلا انها مخنوقة بحريا
لأن طريق التجارة الصيني اللي بتفرضه عليها الجغرافيا بيبدأ من بحر الصين الشرقي ثم يوصل لبحر الصين الجنوبي ثم مضيق تايوان ، وبعد كده فيه مسار بحري إجباري لحد ما نوصل لمضيق اسمه «مضيق ملقا- Strait of Malacca ».... وهنا بقا الدنيا بتبوظ
ليه؟
عشان مضيق «ملقا - Malacca» ده اللي بيقع بين شبه جزيرة ماليزيا وجزيرة سومطرة الأندونيسية واللي بيصل بين بحر أمدان في المحيط الهندي و بين بحر الصين بطول 800 كيلومتر وعرض ما بين 50 و 120 كم واللي بيطلق عليه ممر الموت
المضيق ده ليه أهمية استراتيجية كبرى ويعتبر من أكبر ممرات الشحن الدولية ، لأنه بيمر من خلاله ثلث تجارة العالم ونصف ناقلات النفط ، والصين بالذات بتستورد نحو 80% من احتياجاتها النفطية عن طريق هذا المضيق
والمشكلة الكبرى للصين ان الأسطول الامريكي مسيطر على مضيق «ملقا» ده تماما وعامل هناك قاعدة عسكرية بتمنع مرور السفن الصينية إلا بطلوع الروح وبعد مفاوضات وشد وجذب ، وده بيخللي السفن الصينية تركن في البحر لأيام كتيرة
.
- طاب تعمل ايه الصين عشان تفك الخنقة دي؟
راحت فكرت في بدائل أخرى آمنة تكون بعيدة عن المسار ده ، وقررت تعمل مشروع قومي كبير اسمه #اللالئ_المضيئة.. اللي هو عبارة عن عدة موانئ «لآلئ» في أماكن هامة واستراتيجية متفرقة من العالم مربوطة ببعضها بطريق بحري ضمن مشروع «الحزام والطريق» عشان تفك حصار الأسطول الأمريكي اللي مطوقها
ودورت على الخريطة لحد ما لقيت ميناء كويس يخرجها من الخنقة دي
- والمفاجأة بقا ، يطلع المينا ده فين ؟ في بلد اسمها «ميانمار» اللي هي كان اسمها «بورما»
- «ميانمار» أو بورما دي دولة مستقلة تربطها بالصين علاقات ممتازة
الصين راحت لرئيسها «ثان ثان شوي» وقالتله انا هعملك نهضة صناعية ونطورلك البلد في مقابل مشروع مشترك بيننا احنا اللي هنتكفل بيه وهنشغل ناسك معانا وهنقلل لك البطالة فهنعمل ميناء بحري عندك وطريق بري يربط بين البلدين المتجاورتين بحيث يطلع من الصين يوصل للميناء ده
الأخ «ثان شوي» وافق طبعا وعملوا عدد 2 ميناء بحري على سواحل اقليم ساحلي في ميانمار اسمه أقليم «أراكين» أو أراخين بيطل على خليج البنغال على المحيط الهندي .... واتعمل كمان خط أنابيب غاز وبداية الطريق البري الجديد
وبكده الصين مابقتش محتاجة تعدي من «مضيق ملقا» لأن الميناء ده بقى هو المتنفس الجيوبولتيكي للصين على المحيط الهندي وخليج البنغال ، لأنه بيمنح الصين الوجود الاستراتيجي في المياه العميقة للمحيط الهندي، بعد أن كانت دولة حبيسة على المحيط الهادئ
كما أن هذا الممر وفر منفذا بحريا للمقاطعات النائية في الجنوب الأوسط للصين على المحيط الهندي
- بس المشكلة بقا اللي استغلتها أمريكا ولعبت فيها لعبتها المفضلة ان أقليم «أراكين» دا بتسكنه قومية «الروهينجا»
فطبعا أمريكا اخترقت «الروهينجا» اللي هما المسلمين البورميين وسخنتهم عشان يستقلوا عن «ميانمار» ويعملوا دولة بتاعتهم لوحدهم بحجة انهم لازم يبعدوا عن البوذيين وما يعيشوش معاهم في دولة واحدة
تاني حاااجة ،واللي يزعل يشرب من خليج البنغال بالمناسبة يعني
«الروهينجا» فيه نسبة كبيرة منهم إخوانجية وفيه نسبة منهم كمان بيعتنقوا فكر السلفية الجهادية، وطبعا مفيش داعي أوضح أكتر من كده
يا راجل دول لسه بيدعوا لمرسي في الجوامع لحد دلوقتي
المهم،«الروهينجا» تمردوا طبعا على حكومة جمهورية «ميانمار»
وبالتالي بدأ الجيش الماينماري يدب فيهم
📌 هوووب يحصل انقلاب علي الرئيس «ثان شوي» ويعتقلوه وتدخل الأم الحنونة أمريكا لتنصيب واحدة عميلة اسمها «أونج سان سوتشي» و دي كانت من عملاء الـ«CIA»
فكان أول قرار لها هو وقف مشروع الموانئ الصينية وطرد المهندسين والملاحين والبحريين الصينيين
📌 بس كان خلاص الروهينجا كانوا سخنوا بقا وعملوا جيش تحرير الروهينجا «أرسا»
عشان فجأة حسوا ان عيشتهم مع البوذيين حرااام في حراام
ونزلوا بقا بأسطوانة ضاع اسلامونا
فـ امريكا قالت لعميلتها : دوسي براحتك واعملي ما بدالك في الروهينجا ، دول حيالله شوية مسلمين بنحركهم بالريموت كونترول
وعشان تشجعها وتحصنها أكتر راحت مدياها جايزة «نوبل» في السلام اللي خلاص بقت جايزة مشمومة
وطبعا كلنا فاكرين إزاي يتامى البنا ورعاتهم اشتغلوا علينا وقتها بأسطوانة الاضطهاد الديني والحرب على الإسلام ، وهاتك يا كربلائيات ولطميات ومرثيات وصراخ وعويل على مسلمي الروهينجا اللي بيتعرضوا لإبادة جماعية دينية على يد حكومة ميانمار برئاسة السيدة «أونج سان سوتشي» ؟
لكن القوميين هناك - وبدعم صيني من تحت لتحت- اكتشفوا حقيقة الرئيسة العميلة دي ، فالجيش انقلب عليها من حوالي سنة كده وشالوها واعتقلوها
- وجابوا رئيس تاني مكانها اسمه «هيتن كياو» ودا موالي للصين طبعا ، فبيكون اول قرار ياخده انه يرجع يفتح الموانئ تاني
بس المضحك بقا انه لما حصل انقلاب عسكري على نفس هذه الحكومة ، خرج زعيم الروهينجا اللي اسمه «ديـل محمد» ليعلن رفض مسلمي ميانمار (بورما) ، للانقلاب العسكري الحاصل في البلاد داعيا المجتمع الدولي إلى التدخل واستعادة الديمقراطية بأي ثمن
وبعدها خرج خليفة المسلمين وحامى حمى الدين شخلول أسطنبول ليندد هو الآخر بالانقلاب اللي حصل بحجة انها حكومة ديموقراطية منتخبة !!
اللاه ... مش دي الحكومة اللي انتوا قولتولنا انها حكومة كــافرة عنـــــصرية بتحارب الاسلام وبتعمل ابادة جماعية للمسـ،ــلمين
واللي ياما شتمتوها وكشفتوا راسكم ودعيتوا عليها و استمطرتوا عليها اللعنات!؟
زعلانين عليها دلوقتي ليه بقى؟ما تسيبوها تغور في داهية
واللا عشان الأخت"أونج سان سوتشي"دي موالية لماما أمريكا اللي أعطت الاشارة لـــKـلابها في كل مكان بالعالم بضرورة شجب ورفض اللي حصل في ذلك البلد البعيد
لأن المخطط كله هو ضربة استباقية من الصين لمنع تطويقها بحكومات عميلة للغرب ؟
.
- بس العركة بتاعت الروهينجا لسه شغااالة، وطبعا الصين عاملة قاعدتين عسكريتين لحماية الميناءين واللي بيقرب منهم سواء كان روهينجا بقا واللا بطيخ بيتم إبادته .. و ده حقهم على فكرة
يعني تخيل مثلا انه هنا في مصر جات جماعة تدعي انها اسلامية وقالت احنا هنستقل بمنطقة قناة السويس، فمحدش هيسمي عليهم
.
وبكده نكون عرفنا إيه حكاية الروهينجا دي وليه أمريكا بتدافع عنهم وعايزاهم يستقلوا عن ميانمار
عشان تقفل الطريق البحري على الصين وتعزلها عن الساحل الغربي
في نفس الفترة دي الصين دورت على بناء لؤلؤة جديدة
فين بقا المرة دي ؟
في «باكستان» ، فراحت عملت ميناء عظيم اسمه «جوادار» والكلمة دي هي مزيج من الكلمتين البلوشيتين جوات (الرياح) ودار (بوابة)
وتم توقيع اتفاقية بين الصين وباكستان تم بموجبها تسليم حقوق إدارة ميناء «جوادار» لمجموعة «تشاينيز أوفر سيز» القابضة والصين استثمرت فيه أكتر من 60 مليار دولار
- وباكستان تعاونت جدا لأن الصين منحتها 25% من الأرباح و دربت وشغلت مواطنين باكستان وفتحت أبواب رزق
وحركة ملاحة وسياحة وليلة كبيرة أوي سعاتك، وميناء «جوادر» اشتغل زي الفل
وأهمية ميناء «جوادر» ده انه بيطل على «بحر العرب»، يعني بالقرب من «مضيق هرمز» اللي بتعبر منه ثلث تجارة النفط العالمية
والأهم انه واقعيا أقرب إلى الصين من الصين نفسها فهو أقرب لتجارة إقليم «شينجيانج» الصناعي الصيني من الموانئ الصينية الشرقية ، وبيختصر حوالي 1200 كيلومتر من المسافة ، يعني بضائع الصين أسهل وأقرب لها انها تعبر برّا عبر «باكستان» لحد ما توصل لميناء «جوادر»
من انها تعبر بعرض الصين كلها حتى تصل للموانئ الشرقية الصينية
- على فكرة ، ميناء «جوادار» ده كان في السابق بيقع تحت سيطرة «سلطنة عمان» حتى استعادته باكستان عام 1958 وظلّ معطلًا حتى عام 2002 قبل بدء باكستان في الاستفادة من عمق مياهه وصلاحيته لاستقبال السفن الكبيرة
بس الموضوع ده أصاب أمريكا بالجنون طبعا
فراحت للعدو التاريخي للصين اللي هو «الهند»
وقالتلها هي مش الصين هتعمل «طريق الحرير» .. انتي بقا هتعملي «طريق القطن»...والله ما بهزر هو اسمه كده 😁😁
بس انتي يا مدام هند عارفة اننا ما بنكلمش «إيران» وناصبة عليها في جمعية .. فأنتي بقا بما انك بتتعاوني تجاريا مع ايران هتعملي هناك ميناء بحري احنا هنموله من تحت لتحت، بس انتي اللي هتديريه اللي هو ميناء «تشابهار» الايراني
بس المشكلة ان ايران بعد ما عملت ميناء «تشابهار» داست فيه لحسابها وإدت قفا لأمريكا وبقت بتاخد الأرباح لوحدها وبتدي الهند 30% و بتدي امريكا حاجات تانية عيب الواحد يقولها
تسكت أمريكا على القفا ده ... ابدااااا
راحت اشتغلت على محورين :
المحور الأول الحدود الباكستانية الصينية اللي فيها اقليم «شينجيانج» أو ما كان يعرف بـ «تركستان الشرقية»
عشان دي مين قاعد فيها ؟
أيوه هما بالضبط ، حبايبنا مسلمين «الإيجور» .. اللي كنا اتكلمنا عنهم زمان من حوالي 4 سنين وقلنا انهم عرقية بتنحدر من أصول تترية تركية
وبيبلغ تعدادهم حوالي 20 مليون نسمة تقريبا ، وبيشكلوا حوالي 45% من اجمالي سكان الاقليم
ففجأة افتكر «الإيجور» انهم أقرب عرقيا وثقافيا لأمم «آسيا الوسطى» اللي بتضم عدة دول منها «قرغيستان» و«أوزبكستان» و «كازاخستان» و «طاجيكستان»
وبقوا عايزين يستقلوا ومش عايزين يعيشوا مع قومية الـ «هان» الصينية
وبدأوا حرب التحرير بتاعتهم بالاعتداء على الأسطول التجاري الصيني .. فالصين قامت عليهم و روقتهم ونزلت دب فيه بلا هوادة
فبدأوا يلطشوا في الباكستانيين اللي هما مسلمين زيهم برضه بس مش بيخلونا في المود بتاع الاستقلال
وتقوم العركة بتاعة «الإيجور» اللي كلنا فاكرينها وفاكرين الكربلائيات اللي اتعملت عليها
.
📌 المحور التاني : ايران مطلعة عين أمريكا في ميناء «تشابهار» ومش بتديها ولا مليم
فأمريكا طبعا ما سكتتش
واكتشفت ان ميناء «تشابهار» موجود في منطقة اسمها «بلوشستان»
فإذ فجأة كده وبقدرة قادر تطلع حركة مسلحة من البلوش اسمها «جند الله» و مقاتلي الجهاد ويقرروا انهم عايزين يستقلوا ويعملوا دولة البلوش
وطبعا أمريكا الكيوت المتسقة مع مبادئها لازم تدعم حقوق الأقليات وحقوق الانسان وحقوق الزقازيق ، المهم ان الكوكب يتفتت لديشيليار حتة
وتبدأ ايران تطحن في البلوش ومعاها الهند
فييجي البلوش سنة 2005 يضربوا ميناء «جوادار» ويقتلوا 5 مهندسين صينيين ..
فتدخل الصين وتعمل قاعدة عسكرية في الميناء ده وتحوله من لؤلؤة لقنبلة ، وتنزل ضرب في البلوش من القاعدة العسكرية دي .. ماهي جمعية و دايرة ياباااا ومطحنة ماتعرفش أولها من آخرها
وطبعا في وسط المعمعة دي
حبايبنا زومبيات البنا ومراكيبهم ، نازلين هبد ومحن اسلامجي عفيف من عينة إلحق يا جدع الروهينجا .. حلق يا جدع ع الايجور
ضاع اسلامونا ، وأين المجاهدين وأين المنظمات الاسلامية والمجمع الاسلامي والأزهر
وانزل يابني بطاجن الهاشتاجات والمأساويات
ودي بقا يا سيدي حكاية اللآلئ المضيئة الصينية
ومش هنتكلم عن بقية اللالئ اللي الصين بتعملها ومجننة أمريكا عشان ما نطولش أكتر من كده
عندك مثلا ميناء «جيبوتي» على البحر الأحمر والمحيط الهندي .. وميناء في غينيا بيطل على المحيط الأطلسي .. 👇
والمهم في كل ده ان أمريكا في صراعها المحموم مع الصين على السيادة البحرية دايما بتلعب بورقة الدين والأقليات والعرقيات لأنهم أجبن من ضرب صاروخ واحد على الصين زي ما هما أجبن من انهم يضربوا صاروخ على روسيا .
