بقلم - هناء سالمان
إعلام الدفاع الوطني
شئون المراة - النمسا ڤيينا
أختلفت الاقاويل علي مرسي مطروح بس ليه انا اخترتها , وديه اول مره اطلع مرسي مطروح في حياتي , بس دايما كنت اسمع عن مرسي مطروح و جمال بحر مرسي مطروح و انه من كتر صفائه و نقائه تبقي في حاله دهشه من الجمال و عن شاطئ عجيبه و شاطئ حمام كليوباترا و سحر شاطئ الغرام و صخره ليلي مراد و شاطئ الابيض و و و و , فقولت مش معقول يبقي كل الجمال ده في مصر و الواحد يروح مكان تاني و كانت العقبه الوحيده هو طول مشوار السفر .
بس بعد مارحت وشفت جمال وإبداع الخالق نسيت القعدة في الأتوبيس لمدة ٧ ساعات وبصراحة تستاهل ولو اكتر من كده برضو تستاهل.
احلي حاجه في مرسي مطروح انها بعيده جدا عن الدوشه و الزحمه الي بنشوفهم في القاهره و كمان دوشة إسكندريه في الصيف , المسافه من القاهره الي مرسي مطروح من ٦ الي ٧ ساعات تقريبا علي حسب مسافر بعربيه ولا سوبر جيت .
بس الاختيار الي كان انسب ليا هو إني سافرت تبع ، شركة سياحية ، بتوفر المواصلات ، والفطار ، يعني حجزت ودفعت وذهبت مكان التجمع و فعلا الأتوبيس جاء في ميعاده .
يوم السفر الي مرسي مطروح .
طبعا قبلها بيوم حضرت الشنط و المايوهات .
وصلنا تقريبا الساعه ٧ , ٧ وربع بالظبط .
بالنسبه للمياه في مرسي مطروح فهناك مشكله فيها , المياه هناك بيعتمدوا فيها علي اجهزه تحليه للمياه , ومعظم الناس هناك عايشين علي خزانات مياه الي بتجيها عربيات المياه كل يوم الصبح و بتملي الخزانات و الموضوع مكلف جدا ده الي انا شوفته , و كل ما هتمشي في مطروح هتلاقي زجاجات المياه المعدنيه في كل مكان للبيع .
شواطئ مرسي مطروح كتير جدا منها العام و منها الخاص , من اشهر شواطئ مرسي مطروح شاطئ العوام , شاطئ الليدو , شاطئ الفيروز , شاطئ روميل , شاطئ الابيض , شاطئ الغرام و غيره
انا هتكلم عن الشواطئ الي روحتها .
شاطئ الليدو :
الحته النضيفه من العوام , جنبه بشويه كده المياه فيه زي العوام بس انضف شويه و مفيش صخور كتير و بيتنضف كويس و القعده فيه حلوه في قهوه جوا و بتاع زلابيا و دلع الذره المشوي وغزل البنات مع اطعم ايس كريم .
شاطئ الابيض :
ماذا اقول و اي قولا يقال بعد الي اتقال هيا كلمه واحده هقولها جنه الله في الأرض فعليًا , ايه ده ! ايه الجمال ده ! شاطئ كده حاجه و هم وخيال ،
المياه صافيه و نقيه و تفتح عينك تحت المياه تشوف , الرمال بيضاااااء و نظيفه و الهواء هناك رائع .
مش هتلاقي هناك غير الناس كييفه البحر ليه بقي علشان شاطئ الابيض بعيد عن وسط البلد بتركب ليه علشان تروح بتاع تقريبا نصف ساعه كده او اكثر شويه .
بس يستاهل .
ما هو مينفعش تيجي مطروح من غير ما تعدي علي حمام كليوباترا و تسمع الالشه الشهيره من الناس هناك ( اصل كليوباترا كانت بتستحمي هنا ) اه والله لازم كل الي هناك يقول الالشه ديه
المكان هناك اول ما بتروح بتلاقي تمثال كليوباترا موجوده بره الناس كلها بتتصوره ،
هو عباره عن كهف صخري كبير فيه مدخل بتتسلقه كده و بتدخل جوا هتلاقي زي ما الصور اللي الكهف مفتوح من الاعلي للسماء في مكان مدخل للمياه من كهف صغير و مكان اخر بتخرج منه المياه
شاطئ عجيبة :
هيا اسمها عجيبة و هيا عجيبة فعلا , طول ما انت هناك هتفضل تقول سبحان الله علي الجمال ، خلق فأبدع ،
هتشوف من فوق علي اجمل منظر ممكن تشوفه في حياتك , تدرج الالوان الزرقاء مع الهواء العليل مع لون الصخور ياالله سبحانه وتعالى ، حرفيا كنت مذهولة من إبداع الخالق وتناسق الألوان مع روعه الصخور في حضن الأمواج .
معظم الناس الكبار بتفضل قاعده فوق علي السور و الاستراحه مش بيقدروا ينزلوا لان علشان تنزل تحت بتنزل علي سلم طويل على شكل حزام بين الصخور .
لما تمشي علي الجنب ناحيه الصخور و تصور المناظر الجميله و تتفرج علي ابداع الخالق .
الالوان هناك مريحه يعني تبص للبحر اللون الازرق يريح عينيك , تبص للصخور منحوته ومدرجه كأنها قطع من الاحجار الكريمة ولونها في إضاءة عجيبة.
شاطئ الغرام .
وماادراك من هو شاطئ الغرام ،
يعتبر شاطئ الغرام الذي يقع بغرب مدينة مرسي مطروح، من أشهر شواطئ الساحل الشمالي، حيث غنت المطربة ليلي مراد على إحدى صخوره بأجمل عبارات الغزل والحب في فيلمها الشهير مع الفنان حسين صدقي شاطئ الغرام .
غنت الفنانة الراحلة ليلى مراد، من على إحدى الصخور فى شاطئ الغرام، بمطروح وجمالها ولأهلها، قبل منتصف القرن الماضى يا ساكنى مطروح جنيَّة فى بحركم.. الناس تجى وترُوح وأنا عاشقة حيكم فى فليمها الشهير شاطئ الغرام فما كان من أهل مطروح، إلا أن ردوا على أغنيتها بإطلاق أسم الفيلم على الشاطئ الذى تغنت فيه شاطئ الغرام وعلى الصخرة التى كانت تجلس فوقها صخرة ليلى مراد .
ومنذ ذلك الحين، اكتسب الشاطئ اسم شاطئ الغرام نسبةً إلى الفيلم،
أما عن الصخرة التي كانت تجلس عليها ليلى مراد أثناء تصوير الأغنية، والتي مازال لها بقايا حتى الآن، فأصبحت تُعرف بـ صخرة ليلى مراد .
و غالبية المتزوجين حديثاً يحرصون على زيارة الشاطئ، والتقاط الصور عند صخرة ليلى مراد، حيث غنت وهي جالسة أمام أمواج البحر وهي تحكي لحبيبها عن لوعة غرامها وأشواقها.
ويحرصون علي زيارة الشاطئ والذهاب إليه وأول ما يسألون عنه هي صخرة ليلي مراد، التي غنت وهي جالسة عليها لموج مطروح، تترجاه أن يحكي لحبيبها عن لوعة غرامها وأشواقها إليه، حيث يلتقطون الصور الجماعية والفردية من كل زواياه، بينما يحرص الشباب علي تسلق إحدى الصخور الكبيرة بالشاطئ والقفز من أعلاها في مياه البحر الكبير أو الغريق كما هو شائع، وتعتبر من أشهر الرحلات السياحية علي شواطئ مرسي مطروح، رحلات مراكب الشراع التي تنطلق من شاطئ روميل شرقا وحتي الغرام غربا ثم العودة مرة أخري وخاصة قبل ساعات الغروب.
الشاطئ جميل ونظيف، فعليًا و مياه مرسى مطروح نقية للغاية.
وعلى الرغم من تنوع شواطئ محافظة مطروح، التى تنتشر من الإسكندرية شرقًا وحتى السلوم غربًا بطول حوالى ٤٥٠ كيلو مترًا، إلا أن شاطئ الغرام يظل هو الأشهر والأكثر إقبالا وزحاماً بالمصطافين، من كل الفئات الاجتماعية، ويتوافد عليه ألاف المصطافين يوميا، للاستمتاع بالسباحة والطبيعة الخلابة وإطلالته الرائعة على مدينة مرسى مطروح من الجهة المقابلة .
أتمنى ان الكل يذهب الي جنه الله في الأرض ، وبتمنى ان تستمتعون بجمال الخالق وتناسق الالوان .
